أجرت لجنة أهالي العكر الخيريّة مقابلة مع مدرب فريق العكر صادق درويش مساء يوم الثلاثاء 27 أبريل 2010م بعد إنتهاء تدريبات فريق الشباب، ونعتذر لكم على التأخير في وضع المقابلة لبعض الظروف التي حالت دون ذلك.. إليكم نصّ اللقاء:

اللجنة: في البدايه نرحب فيك كابتن صادق ونطلب منك قصيرة  عن حياتك التدريبية؟

صادق درويش: البطاقة الشخصية لصادق درويش، أعمل في وزارة الداخليه وكنت لاعبا سابقاً في نادي الاتحاد ثم نادي القادسيه، مسيرتي التدريبيه بدأت تقريباً منذ 18 سنه، بداية دربت في نادي القادسيه دربت فئة الشباب  ودربت الفريق الأول وبعدها دربت فريق الحجر 5 سنوات وفزت مع الحجر ببطولتين في دورة التعارف ودربت النويدرات وحققت معاهم دورة التعارف بعدها دربت الهملة بعده سار ووصلت النهائي بعدها رجعت للحجر دربتهم وحققت معاهم البطولة ودربت الإتحاد سبعة مواسم وكنا دائما منافسين وحققت معاهم بطولة الدوري العام لفئة الشباب وستة مواسم وصلنا فيها إلى الرباعي في الكأس والدوري.   

اللجنه: ما شاء الله عليك كابتن دربت أندية عديدة. لماذا وافقت على تدريب نادي العكر ولفئتي الشباب والكبار؟

صادق درويش: تقول لي ليش اتجهت للعكر؟ أنا أقول دائما والكل يقول في بعض المدربين يحقق بطولات دائما مع نفس الفريق لأن اللاعبين شايلينه لكن اذا المدرب كل فريق له يحقق معاه بطولة ما اعتقد اللاعبين شايلينه، ونضرب مثل بدار كليب عنده مجموهة وممكن أي مدرب يحقق معاهم بطولة، لكن أنا أحب دائما أدخل مغامرة، بتقول ليش جيت العكر؟ أنا متابع فريق العكر وأعرف لاعبينه ودائما أقول ليش العكر ما ينافس مو يجيب بطولة ليش ما ينافس وانا احلل في بتلكو أقول  إلى ابو فوزي فريقكم زين عندكم لاعبين ليش ما تنافسون؟ ليش فريقكم ما له هيبه مع إن امكانيات لاعبينكم زينه، بالاضافة لمعرفتي ببعض اللاعبين فقلت هي مغامرة وقلت بكل أمانه أنا حبيت العكر لأن وقف ويايي جمهورهم في دورة التعارف مع النويدرات أمام فريق المعامير وكنا ما نملك جمهور عكس المعامير فكان للعكر دور كبير في تحقيق البطولة وأنا حتى في الصحافة شكرتهم لأن كانت لوقفتهم دور كبير وأنا أريد أرد هذا الجميل وسيعتبر انجاز لي لو حققت أي بطولة مع أي فريق، وأعرف العكر من سنوات يمتلك جماهير في التعارف ما أحد يمتلك مثلها وهذي لجماهير اندثرت في السنوات الأخيرة وكنت اتسآل عن هذا الشي دائما واللي روّح هذي الجماهير النتايج والمستوى، واللي يجلب الجمهور النتائج والمستوى وحتى اذا خسر يفتخر بمستوى الفريق وهذا اللي خلاني أجي ادرب العكر.  

اللجنة: البطولات ان شاء الله؟   

صادق درويش: البطولات ما اوعد ابها يا علي، أوعد بشي واحد اني اخلق فريق محترم والدليل في اول مباراة ودية امام سار بعد المباراة وتعرف لاعبين سار متعلقين فيني بشكل كبير، يقولون لي كابتن ويش سويت بالفريق قلت ليهم ما سويت شي!!  قالوا الفريق غير يعني احنا لاعبين وياه بالتعارف عاطينه خمسة احنا غالبين ست فرق قلت ليهم ما سويت شي اللي سويته ليكم سويته ليهم وهذا انا اللي اتمناه ان الناس دائما تقول العكر فريق محترم والجمهور اذا يجي يصفق للاعبين ويقول عندنا فريق، عندنا لاعبين، حتى لو خسر وطبعا الكل يتمنى الفوز ويحقق البطولات لكن اهم شي تكون فريق محترم واريد بدل ما اكون صيد سهل واللي يتمناني معاه اخلي الكل يتجنبني وهذا اللي انا أتمناه، وهذا ما بيجي صادق درويش يسويه إلا باللاعبين والادارة والجمهور، ودائما البطولات اللي حققتها ما حققتها لوحدي علشان ما اكون اناني كان خلفي ناس تعمل لاعبين تجتهد وتقاتل في الملعب والبطولة تتحق بتعاون الجميع واتمنى في العكر احصل تعاون الجميع.  

اللجنة: هل ترى بأن الإدارة متعاونه معك ومع اللاعبين؟  

صادق درويش: طبعا من دون شك أنا قلت لكم شيء وحدي ما اقدر اسويه، طبعا شي واحد دائما انا اسويه، اخلي اللاعبين هم الاقرب لي، هم اللذين يعملون داخل الملعب وتحفيز الادارة مطلوب، وبكل أمانه معي حميد وعبد الله وهما قائمان بالواجب على قدر استطاعتهما.  

اللجنة: قضية مساعد المدرب، في كل فريق لازم يكون مساعد المدرب متواجد مع المدرب لكننا نراك وحدك من دون مساعد مدرب؟   

صادق درويش: طبعا هذا الشي يرجع للإدارة في الأول والأخير وأنا طلبت من الإدارة عدة مرات مساعد المدرب، طبعا يا علي مساعد المدرب لا يقل عن المدرب شيء يعني اذا لم يكن في مستواه يكون أقل بدرجة أو درجتين عنه، ويجب أن تكون في مساعد المدرب صفات تتناسب مع المدرب فسوف يكون ذراعه الأيمن وفاهم لفكره التدريبي مخلص مع المدرب وأنا دائما قبل تدريب أي فريق أسأل عمن سيكون معي، من مساعد المدرب ومن المشرف معي، أنا أختار مساعد المدرب أقول له يمين يقول يمين ما يقول يسار، وهذا سبب نجاحي في جميع البطولات جميع الفرق يعني لما أذكر لك أسماء الفرق اللي أنا دربتها وكانوا وياي بصراحه لو مهما أكون أنا غلطان ومهما أكون قاسي على اللاعب ما يصير بصف اللاعب يقوله انت غلطان، رغم أني يمكن أكون شاد عليهم لأن دائماً نحن لا نصلح الفرق، الكابتن ما سوى هالشي هذا الإ في شي في راسه، لكن لما أنا أجيب لي مساعد مدرب بدل ما يصير بصفي يصير ضدي،هذا الشي هذا ما يصير فيه نجاح وهذا دائماً أركز عليه، المساعد في مسؤولية الادارة هي التي تختار المساعد، لكن المساعد أنا أقيمه إذا أنا اقتنعت فيه أقولكم خلوا وإذا ما اقتنعت فيه أقول هذا المساعد ما أبيه لكن الى حد الحين ....

اللجنه: لا يوجد شخص كفئ؟!  

صادق درويش: مو ما في، بالعكس أنا أرحب بإي واحد يجيني وأختبره، مثلاً: لو قالوا لي راح انجيب علي اقول له حياه الله انا راح أختبره مجرد أسبوع إذا أقتنعت فيه أهلاً وسهلاً وإذا ما أقتنعت أقولك لا، ما أقول هذا ما أبيه وهذا ما أبيه، بل أشوف هل هذا ملائم لي، هل يطابق العمل اللي أنا أبيه، فأنا في شي واحد دائماً أريد اللي وياي يكون نفسي أول شي لازم يكون النظام، قوة شخصيته وفي نفس الوقت يكون لي ذراعي اليمين يعني ما يعمل بس في الملعب، يعمل خارج الملعب أيضاً، في بعض اللاعبين يصيدهم ظروف بعضهم يغيب، بعضهم عندهم إصابات لازم المتابعه مثلاً يسأله عسى ما شر وشفيك يشوف شنو ظروفه أو لاعب مصاب يتابع إصابته، في نفس الوقت يمكن أنا غريب على الديره فلو يكون ويايي مساعد من الديره فيقولي ترى في لاعب كذا وكذا، نروح له مثلاً نقول له ليش فلان ما تنزل النادي نشوف شنو مشكلته ونحاول نحلها، نحاول قد ما نقدر نحل المشاكل لأن عارف التعارف وعارف القرى وعارف مشاكلها وعارف كل واحد أحزاب وعارف الحزازيات نحاول قد ما نقدر نقرب وجهات النظر ونخلي الأمور الوسط عشان كلنا نكون يد وحده نفس ما عملت في النويدرات والحجر وفي سار كانوا أكثر من هني مشاكل، نويدرات في نابولي وفي النجوم وهذي ادارة وهذي اداره ضد النادي فجيت انا لما حليت المشكلة واقنعت الادارة فلبوا لهم طلباتهم واللاعبين جوا تشجعوا، لأن اللاعبين يقول احنا إذا انجي معروفين اللي يلعبون فيبقون الكبار أنا لا اريد ان اذكر اسامي ولا عائلة من، فيرجعون فيقول ليش انروح فلما جيت انا تغير الوضع لاعب جاب لاعب، فلما يرجع العصر الملعب هناك فيقول الكابتن كذا وكذا فشجعوا كلهم جوا فحققت انجازات ولما تركت الفريق عاد الى الصفر صار الحين فريق صيد سهل لأن ردت الحزازيات من جديد فأنا بروحي ما اقدر، مو لازم تكون ادارة صراحة يا علي يمكن احد الجماهير يقول ليي فلان وفلان يلعبون زين ليش ما يجون يلعبون اقوله له يا الله جيبه ليي اهني وانا اقنعه يلعب وتبيني اروح وياك البيت اروح البيت اقنعه اشوف مشكلته وما في مشكله ما ليها حل ما اعتقد انا الادارة تمنع اي لاعب يجي . 

اللجنة: بماذا يختلف صادق درويش عن بقية المدربين؟  

كل مدرب اليه اسلوبه وكل مدرب يقول ليك انا أأدي واجبي وكلمة حق قالها انا اجي الملعب ادربهم وامشي، صادق درويش يعمل خارج الملعب، يعني اروح للاعب الى بيتهم وتشوف الحين انا قاعد متأخر، يعني في مدرب عندك يدرب 3 ساعات، حده اذا صار ساعتين الا ربع او ساعة ونص، جاء اللاعب او ما جاء مو شغله شغلة المشرف، انا لا، انا لما اجي واللاعبين متأخرين أنا أضجر أو لاعبين اثنين غايبين اضجر، في مدربين يعطون كثير اجازات انا ما اعطي الا اذا اشوفك هلكان اعطيك اجازه، ورب العالمين يقول اسعى يا عبدي ويعطيك على نياتك، حتى في كثير من الناس تتكلم تقول شنو عنده صادق درويش هل عنده سحر او المصباح السحري، واللي يعملون ويايي يردون يقولون الكابتن في عمله مخلص، انا انظر دائما الى المستقبل يعني كل الفرق اللي دربتها للحين تتمنى صادق درويش يرجع، وهذا اللي اتمناه مع العكر ايضا.  

اللجنة: نحن بصدد المشاركة في دورة عالي، هل ترى بأن المدة كانت كافية للإعداد؟  

صادق درويش: المدة كافية لكن واجهتنا بعض الظروف، انا اقولها بكل صراحه اولاً عدد اللاعبين غير كافي للمنافسه، لانك اذا تريد تنافس تحتاج حوالي 20 لاعب في مستوى واحد ونفس طويل، انا انصدمت بايقاف 4 من افضل اللاعبين، ولاعبين آخرين مصابين، يعني 6 لاعبين فقدتهم دفعة وحده، وفقدتهم في وقت قصير قبل الدورة، وكان المؤمل بنسبة 80 بالمئة مشاركتهم، في النهاية انصدمت ان اربعتهم ما يلعبون، بالاضافة لعدم وجود البديل الجاهز بعد ابتعاد هؤلاء الستة، بعض اللاعبين ايضا عندهم امتحانات وهذا ايضا مؤثر على الاقل كان راح يتواجد البديل، رغم ان الاعداد كان كافي لكن راح نسعى.   

اللجنة: من هم اللاعبين الموقوفين والمصابين؟   

صادق درويش: يوسف عبدالكريم،جعفر عبدالله العمدة، حسن علي وعلي حسن حبيب،المصابين علي قمبر وأحمد حسن.  

اللجنة: في ظل هذه المشاكل المستجدة، ما الذي تغير من نظرتك لدخول البطولة، نقصد ردة الفعل تجاه ما حصل؟  

صادق درويش: طبعا بدون شك أنا متأثر جدا، فهو موقف صعب لكنني دائما أقول ما دام لدي أمل بسيط يجب أن أتشبث به. ففي العام قبل الماضي مع ناي الاتحاد كنا لا نملك ملعب ونتدرب على قطعة صغيرة والدوري ذهاب واياب فسبب علينا ضغطا كبيرا، في الدور الأول جمعت بس نقطتين وفي نهاية كل مبارة اقول الى اللاعبين في امل نتأهل، حتى اللاعبين يقولون الكابتن قاعد يرفع معنوياتنا حتى الرئيس نفس الشي ما كان مصدق، لكننا بالفعل تأهلنا للدور الثاني، ولا مباراة خسرت، والكل مستغرب مو مصدق، لأن كان عندي أمل.   

اللجنة: هل يطمح الكابتن صادق درويش للبطولة؟   

صادق درويش: كل الفرق تقول راح آخذ بطولة النويدرات يقول راح ياخذ البطولة والشاخورة مرشح قوي وسار وعالي والمعامير والكل يقول انه راح ياخذ البطولة واللي ياخذ البطولة فريق واحد.   

اللجنة: ماذا تقول في مجموعة العكر؟   

صادق درويش: المجموعة زينه، لكن هل تستطيع اللعب بأحد عشر لاعبا طول البطولة، صعبة وهذا الواقع، ولا ستة عشر لاعبا أيضا، لأنك تحتاج 20 لاعب غير الحراس، على أقل يكون عندك ثلاثة حراس.  

اللجنة: ألا توجد تحركات من قبل الإدارة لاستقدام بعض اللاعبين؟   

صادق درويش: الادارة أو بالأصح القرية لا ترغب بضم لاعبين من الخارج، أنا عندي لاعب جيد من الاتحاد اقدر اجيبه ويحل ليي مشاكل، اقدر اجيب اثنين لكن هل توافق القرية؟  

اللجنة: ليش ما تطرح عليهم؟ يعني مع الظرف الصعب الحالي بالمقارنة مع دورة الناشئين سجلت الادارة لاعبين في الدور الثاني ولم تكن المشاكل الحالية مثل ذاك الوقت؟  

صادق درويش: بعد صارت مشاكل، غابوا اللاعبين بعدين رجعوا، وقالوا ليش جابوا لاعبين واحنا وصلنا الدور الثاني، ممكن هذي الامور تسبب مشكله، وهالأمور صادفتني في نادي نويدرات الصراحه، عقب ما حققت البطولة لعبت دورة بتلكو فابتعدوا ستة لاعبين دفعة واحدة، وقالوا ما دام حققنا بطولة نبي نريح كابتن ما نبي نلعب وكانت البطولة على الأبواب فاستعنت بلاعب بعد النقاش مع الادارة وكان ردهم جميل وقالوا عطيتنا اشياء كنا نحلم ابها وانت تقدر تخلق لاعب، العب بالموجود واللاعبين اللي اعتزلوا خلاص نصنع فريق غيره، وكان ردهم جميل واستعنت بلاعب وفعلا وصلنا رباعي وخرجنا بالركلات الترجيحية امام بوري، في شي واحد دائما اتمناه ان ما يكون كبش الفداء وهو المدرب يعني اذا بتقيم وقبل ما تحكم على احد تعال التمارين وتابع واعرف من الغلطان المدرب لو الادارة لو اللاعب، لا تحكم فقط من المباراة، وهي ثلاثة أعمده ممكن يكون المدرب وممكن الادارة وممكن اللاعبين، لكن غالبا الانجاز يحسب للاعبين والمدرب لأنهم هم اللذي يبذلون في الملعب.   

اللجنة: هناك انتقاد موجه للمدرب صادق درويش وهو الشدة الزائدة مع اللاعبين في المباريات والتمارين، وبعض اللاعبين يقال بأنهم لا يريدون اللعب مع النادي بسبب المدرب، ما هو ردك على هذا الكلام؟ 

صادق درويش: "بإستغراب" سؤال أسأله، هل هذا اللاعب اللي تقول عنه هل نزل التمارين ثم ابتعد أم أنه لم يحضر نهائيا؟  

اللجنة: ربما لم ينزل..   

صادق درويش: إذا كيف أرد على سؤالك؟ شلون شتت اللاعب وهو ما نزل اشلون حكم على الوضع، هل يوجد اي لاعب حضر وانا شتته؟ اذا انت سألتني لازم اسألك لا؟ اذا توجه الي الاتهام لازم يكون عندي جواب، عطني دليل اني هربت لاعب.  

في شيء واحد دائما اقوله، دائما يقولون الكابتن صادق شديد، سألوني الصحافة سؤال واحد الصحفيين اتصل وطلب لقاء وصار معاه لقاء، ولما قعدت وياه يقول انه مستغرب، قلت ليه مستغرب من ويش، الا يقول تصدق في المباراة امبي اصورك وانا خايف ان تشلخني من فوق الى تحت، يقول شفتك الحين غير هادئ وحبوب، قلت ليه هذا عمل ولما المدرب يكون هزلي وما يملك شخصية وما عنده حماس، يعني في نويدرات في لاعب قبل ليلة المباراة قال بطلب طلب لكن ليي الأمان، قلت له اتفضل، قال نبيك تسكت عنا داخل الملعب حتى الادارة طالعته بغضب، قلت ليه ان شاء الله، كنا مع الشاخورة مغلوبين اثنين صفر وأنا ساكت، وقف اللعب جاني على الخط قال مو تصارخ علينا اشتمنا واضربنا محنا عارفين نلعب كره، اتكلمت عقبه وفزنا ثلاثة اثنين، اللاعب دائما يحتاج التنبيه في الملعب ويحتاج حماس في الملعب، اذا ما يعرف راح يتعود، انا دائما اقول لما اجي اوجهك او اصرخ عليك الا لأني أنا أحبك، ولو ما احبك لغاورت عنك لما تغلط، لكن لما اشد عليك انا امبيك تصير زين امبيك تصير لاعب بارز، ولما تجي بعد المباراة ترفع راسك امام ديرتك وجماهيرك ما امبيك تصير مهزلة ولا أنا أصير مهزلة، ورفعت الراس ما تجي الا بالجد والتعب. وصار مع نادي الاتحاد مدرب عراقي اللاعبين احتجوا عند الادارة على معاملته ليهم، فجاهم الاداري وقال ليهم الكابتن صادق ويش كان يسوي ليكم، تصدق بغوا يضربونه!! وقالوا ليه لا تقارنه مع كابتن صادق، والاداري كان يريد يوصل ليهم ان هذا المدرب ممكن مثل كابتن صادق يحبكم بس اعطوه فرصه لكن ما صبروا. لذا هذي الفكرة دائما متداولة بأن الكابتن صادق شديد ولا يصلح للتعامل مع اللاعبين إلخ .... لكن بعد التجربة ولما تنزل معاي تشوف ان كابتن صادق غير، واللي أمبي أقوله هل ان هذا اللاعب جاء وشاف الوضع وانا شردته؟  

اللجنة: السؤال كان للرد على المشككين في الكابتن صادق درويش، وما كان من أجل التأكيد على هذا الشي، إنما انتظرت جواب ينفي هذا الإتهام.   

صادق درويش: أنا ولا لاعب من اللي دربتهم في جميع الأندية اذا أدعى في الأفراح واروح في كأني أنا المعرس اللاعبين كلهم حولي، وأنا ساكن في مدينة حمد وأنا من البلاد وعندي بيت قاعد اعدله أربعة وعشرين ساعة ما يفارقوني اللاعبين، ويمنون أرجع البلاد ويترقبون متى أرجع، شلون يعني مدرب يقسوا على اللاعبين ويلقى هذا التعامل منهم (وهو يبتسم).   

اللجنة: هناك أندية كثيرة طلبت صادق درويش، فهل تفكر في ترك نادي العكر من دون تحقيق أي بطولة؟   

صادق درويش: أنا دائما صريح، والوضع اللي قاعد يصير اذا ما في تحسن صعب أبقى،أول شي الحمد لله أنا مو محتاج وأنا حتى حصلت عرض بمبلغ أكبر من الوضع الحالي بمراحل من نادي الإتحاد للعودة معهم من قبل الرئيس، وأنا ما قلت ليك أني الموسم الماضي كنت ماسك فريقين الشباب والكبار، سؤال بسأله وأمبي أنت توجهه علي بالمنتديات، الكابتن صادق هذا اسلوبه مع كل الفرق وممكن يكون الأقل شدة اهني، هل صادق درويش العمل ماله غلط؟ مع كل هالبطولة اللي حققها سلوبه كان غلط؟  

اللجنة: كلمة أخيرة للكابتن صادق درويش.  

صادق درويش: طبعا أتمنى الخير إلى كل اللاعبين وأتمنى يوقوفون معاي وقفة رجال ويتحملوني، وفي نفس الوقت أطلب من الجمهور المساندة في الحلوة والمرة ويوقف وقفة الرجال معانا، لأنه في نفس الوقت الداعم الحقيقي للنادي، يمكن أنا أول ما جيت واتمنيته أني أرجع الجمهور إلى النادي والمدرجات، هذي امنيتي الأولى، أني أرجع الجمهور إلى المدرجات، والجمهور لما يحضر ويشجع ويصرخ من محبته، لأني أنا أعرف لما نفوز بينزلون وبيشيلونا على أكتافهم وبيتبادلون معانا القبلات، لأن الجمهور بغيرته جاي يبيك تفوز ويبيك تلعب وأتمنى منهم يحضرون ويتحملونا ويآزرونا إذا يبون الكابتن صادق يبقى، لأن بدون جمهور احنا ما نقدر نعمل شيء، لأنهم هم الأساس بعد الله سبحانه وتعالى، لذلك الملعب بدون جمهور مثل الأكل بدون نكهة، هو الأساس وهو ملح الفريق، ودائما أنا أشيد بجماهير العكر، وكذلك أشكر الأخوة (حميد وعبدالله عيسى) على وقوفهم معي وسعيهم الحثيث على مساعدتي وسد النقص في الكوادر الإدارية في الملعب. 

اللجنة: في الختام نشكر الكابتن صادق درويش على إتاحة هذه الفرصة والتجاوب معنا...